當你聽之心動，才發現，其實鈴未動，風也沒動，只是人心自己在動。

《風靈物語》編曲細節

節錄自：論盡音樂 Stupid Music  by   原文網址 ：link 

Carl 叔叔響《風靈物語》嘅旋律同編曲上嘅心機真係落得好多。旋律編排上有《#水刑物語》延續感，後來發現原來《風》原來接《水》，但由於時間製作上太趕，所以先將《#迴光物語》放中間，難怪《風》響旋律 (唔計編曲) 已經同《水》有如出一徹嘅感覺。

至於編曲上，《風》更加將《水》同《迴》最有特式同記憶點嘅部分加入，例如《水》嘅 intro 部分，以及《迴》music break 時嘅電音，令到編曲上都將三首歌融為一體，令人聽到《風》嘅時候，會響歌曲唔同部分聯想到前作。另外三首歌，唔只係每首單曲嘅起伏令人覺得扣人心弦，而係每首比前作格局更大，當三首連住聽時，更加有盪氣迴腸之感。

前面提到，因為時間關係，將《迴》放響第二首，《風》放響第三首。但呢件事，反而覺得係「錯有錯著」地令歌曲感覺更加提升。
呢點要講到小克嘅歌詞。《水》同《迴》雖然同死亡有關，但都只係接近死亡，但《風》就係講死亡後嘅體驗，亦呼應前兩首，就係儘管你曾經尋死或者再為生存掙扎，但到最後人都終需經歷一次死亡。

《風》唔係做一個 roundup，但將整個物語完整地呈理「死前 vs 死後」，尤其《風》呼應前兩首，就算死亡前有執念有黑暗，死後一切隨風遠去，只留下笑容等待轉生。當然，聽到呢首歌嘅人當然未經歷死亡，但從三首歌詞，已經為整個「物語」寫下一個具玄念卻又令人有深刻感受嘅結局。

最後講到 Jer。雖然未必每個人都接受到佢嘅唱法，但我必需講，Carl 叔叔幫用呢三首歌，已經塑造出一個音樂形象俾佢之外，仲發掘出一把好獨特嘅聲線以及唱法，再加上 Jer 本身唱歌有一定技巧下，要令聽過嘅人 (不論喜歡與否) 留下印象，絕對唔係難事。之所以我成日話，一個好監製，就可以監出一個好歌手，因為佢可以發揮歌手最獨特嘅一面，就係咁解。

寫到呢度，我覺得要多謝 Carl 叔叔同小克嘅，已經唔只得 Jer，我地都應該多謝兩位，為樂迷成就一位絕對值得期待更多嘅歌手。